Wëllkomm am Schlass vu Bierg

Schlass Bierg

Moien ! Wëllkomm am Schlass zu Bierg, dat an der Gemeng vu Colmer-Bierg steet. Hei wunnt gemengerhand de Staatschef. Hei hu mir awer och offiziell Reuniounen. Déi sinn dann um Rez-de-Chaussée a mir wunnen op deenen anere Stäck. D’Schlass huet eng ganz schéi Bibliothéik, eng Zär, eng Garage an et läit am Häerz vun engem wonnerschéine Park.
De Grand-Duc

Moien a wëllkomm an eisem Haus. Et kënnt mir vill méi grouss vir zanterdeem d’Kanner net méi hei wunnen, mee mir begéinen eis ëmmer erëm hei, fir schéi Momenter mat der Famill ze verbréngen. Ech si gäeren hei, well d’Schlass ëmginn ass vu wonnerschéine Gäert, ganz ale Beem a schéine Bëscher, déi eng entspanend Wierkung hunn. Fir Nationalfeierdag empfänke mir d’Awunner vu Colmer-Bierg, dat ass dann eng Zort "Nopeschfest", an op der "Garden Party" si lauter Lëtzebuerger Perséinlechkeeten invitéiert.
D'Grande-Duchesse

Lauschter de Wilhelmus

All Kéiers wann de Grand-Duc, d'Grande-Duchesse oder e Member vun der groussherzoglecher Famill un enger Zeremonie deelhuelen, gëtt de Wilhelmus, d'Hymn vun der Maison grand-ducale, gespillt. Dës Hymne, esou wéi mir se kennen, gëtt zënter iwwer honnert Joer gespillt. D’Melodie ass awer scho vill méi al a geet bis op dat XVI. Joerhonnert zréck.

Wann d’Hymn erkléngt, heescht dat, datt de Grand-Duc oder e Member vun der Famill ukomm ass.

D’Fondatioun vum Grand-Duc an der Grande-Duchesse hëlleft deene Leit, déi et net esou gutt hunn an déi net eleng aus hirer Situatioun erauskommen. Wéi si de Grand-Duc bestuet huet, huet d’Grande-Duchesse als Kaddo Sue kritt, déi si sollt benotze fir eng Stëftung an hirem Numm ze grënnen. Si huet awer proposéiert, datt dës Stëftung och den Numm vun hirem Mann sollt droen.

D’Schlass vu Bierg ass d’Residenz vum Grand-Duc Henri an der Grande-Duchesse Maria Teresa. Si wunnen op den ënnerschiddleche Stäck, iwwerdeems offiziell Reuniounen um Rez-de-Chaussée gehale ginn. D’Schlass vu Bierg gëtt et zënter dem Mëttelalter, mä am Laf vun de Joerhonnerten an de villen Aarbechten, déi gemaach goufen, huet et sech vill verännert.

Wärend dem Zweete Weltkrich haten déi däitsch Besatzer eng Schoul fir jonk Meedercher dran ageriicht. Leider hu si deemools vill Miwwelen a Konschtwierker futti gemaach. Et kann een haut nach d’Lächer an der Fassad op der Säit vum Gaart gesinn, wou d’Kugelen ageschloe sinn.

Haut huet d’Schlass eng ganz schéi Bibliothéik, Zären an et steet am Häerz vun engem schéine Park, deen am Respekt vun der Natur ënnerhale gëtt.